ye shab to kya sahar ko bhi shayad nahin pata

ye shab to kyā sahar ko bhī shāyad nahīñ patā

maiñ āḳhirī charāġh huuñ sūraj ke shahr kā

bazm-e-sukūt-e-dil meñ hai halchal machī huī

sārañgiyāñ haiñ kis ke badan kī ġhazal-sarā

merī bayāz-e-dard vo paḌh kar bahut hañse

thā naam jin kā pahle varaq par likhā huā

dekhā 'ajīb ḳhvāb amāvas kī raat ne

ham chal rahe the chāñd pe donoñ barahna-pā

sho'loñ ke haath the ki ThiThurte chale ga.e

phir barf kā libās kisī ne pahan liyā

sone kī tashtarī meñ sajā kar na phuul bhej

ye khel mujh ġharīb se dekhā na jā.egā

ḳhushbū ke ḳhvāb meñ na Dhalī zindagī magar

chandan kī lakḌiyoñ se jalānā mirī chitā

kāġhaz kī naav aag ke dariyā meñ Daal dī

kyā jaane aur chāhtī kyā hai tirī anā

ai dost is qadar bhī akelā koī na ho

maiñ ḳhud bhī apne saath nahīñ dūsrā to kyā

ai 'prem' yuuñ to dhuum thī saare jahān meñ

apne hī ghar meñ koī hameñ pūchhtā na thā

ye shab to kya sahar ko bhi shayad nahin pata

main aaKHiri charagh hun suraj ke shahr ka

bazm-e-sukut-e-dil mein hai halchal machi hui

sarangiyan hain kis ke badan ki ghazal-sara

meri bayaz-e-dard wo paDh kar bahut hanse

tha nam jin ka pahle waraq par likha hua

dekha 'ajib KHwab amawas ki raat ne

hum chal rahe the chand pe donon barahna-pa

sho'lon ke hath the ki ThiThurte chale gae

phir barf ka libas kisi ne pahan liya

sone ki tashtari mein saja kar na phul bhej

ye khel mujh gharib se dekha na jaega

KHushbu ke KHwab mein na Dhali zindagi magar

chandan ki lakDiyon se jalana meri chita

kaghaz ki naw aag ke dariya mein Dal di

kya jaane aur chahti kya hai teri ana

ai dost is qadar bhi akela koi na ho

main KHud bhi apne sath nahin dusra to kya

ai 'prem' yun to dhum thi sare jahan mein

apne hi ghar mein koi hamein puchhta na tha