ye shagufe raat din khilte hain kis buniyaad par

ye shagūfe raat din khilte haiñ kis buniyād par

mujh ko hairat hai binā-e-gulshan-e-ījād par

ye zabāñ-bandī bhī ik be-dād hai be-dād par

muhr zālim ne lagā dī kyoñ lab-e-fariyād par

barq girne ko girī lekin zarā haT kar girī

aañch tak aane na paa.ī ḳhāna-e-sayyād par

but-kade kī niiv zāhid kis qadar mazbūt thī

aaj tak kā'ba bhī hai qaa.em usī buniyād par

ab vahī dībācha-e-ulfat meñ hai 'unvān-e-dil

thā jo ik qatra lahū kā nashtar-e-fassād par

mar gayā maiñ raah us kī dekh kar vā'de kī shab

bhūlne vaalā pashemāñ ab hai apnī yaad par

har kisī ke naam meñ taḳhsīs honī chāhiye

kyoñ na ai 'bismil' miTeñ ham ḳhanjar-e-jallād par

ye shagufe raat din khilte hain kis buniyaad par

mujh ko hairat hai bina-e-gulshan-e-ijad par

ye zaban-bandi bhi ek be-dad hai be-dad par

muhr zalim ne laga di kyon lab-e-fariyaad par

barq girne ko giri lekin zara haT kar giri

aanch tak aane na pai KHana-e-sayyaad par

but-kade ki niw zahid kis qadar mazbut thi

aaj tak ka'ba bhi hai qaem usi buniyaad par

ab wahi dibacha-e-ulfat mein hai 'unwan-e-dil

tha jo ek qatra lahu ka nashtar-e-fassad par

mar gaya main rah us ki dekh kar wa'de ki shab

bhulne wala pasheman ab hai apni yaad par

har kisi ke nam mein taKHsis honi chahiye

kyon na ai 'bismil' miTen hum KHanjar-e-jallad par