ye shohraton ke safar bhi ajib hote hain

ye shohratoñ ke safar bhī 'ajīb hote haiñ

ki ġham-gusār-e-mohabbat raqīb hote haiñ

jo kāhilī meñ qanā'at nasīb hote haiñ

vahī zamāne meñ dukh ke naqīb hote haiñ

talāsh-e-dard ho jin ko sukūn-e-dil ke liye

vo ahl-e-ġham bhī 'ajīb-o-ġharīb hote haiñ

jo dil meñ jazba-e-iḳhlās hī nahīñ rakhte

na jaane kyoñ vahī mere habīb hote haiñ

hamesha sach kī tarāzū meñ ḳhud ko jo toleñ

kisī bhī vaqt vo nazr-e-salīb hote haiñ

jo vāldain kī ḳhidmat se mustafīz na hoñ

vo bachche kitne baḌe kam-nasīb hote haiñ

kuchh aise log bhī hote haiñ zindagī meñ 'atīq'

jo duur hote hue bhī qarīb hote haiñ

ye shohraton ke safar bhi 'ajib hote hain

ki gham-gusar-e-mohabbat raqib hote hain

jo kahili mein qana'at nasib hote hain

wahi zamane mein dukh ke naqib hote hain

talash-e-dard ho jin ko sukun-e-dil ke liye

wo ahl-e-gham bhi 'ajib-o-gharib hote hain

jo dil mein jazba-e-iKHlas hi nahin rakhte

na jaane kyon wahi mere habib hote hain

hamesha sach ki taraazu mein KHud ko jo tolen

kisi bhi waqt wo nazr-e-salib hote hain

jo waldain ki KHidmat se mustafiz na hon

wo bachche kitne baDe kam-nasib hote hain

kuchh aise log bhi hote hain zindagi mein 'atiq'

jo dur hote hue bhi qarib hote hain