ye silsila-e-shoKHi-e-jaanana naya hai

ye silsila-e-shoḳhī-e-jānāna nayā hai

irshād huā hai ki ye dīvāna nayā hai

matlab to hai is se ki hai mai kitnī purānī

is se hameñ kyā kaam ki paimāna nayā hai

ā.īna-e-tajdīd hai tārīḳh-e-mohabbat

jis daur meñ bhī suniye ye afsāna nayā hai

kis dhoke meñ ho tum use kyoñ chheḌ rahe ho

zanjīr purānī sahī dīvāna nayā hai

aatā hai bahut der meñ laġhzish kā salīqa

saaqī se abhī shaiḳh kā yārāna nayā hai

ai sham' tirī sozish-e-derīna kī ho ḳhair

kuchh aaj mazāq-e-ġham-e-parvānā nayā hai

ik 'umr ke baad ab huā andāza-e-vahshat

jab us ne kahā merā ye dīvāna nayā hai

ye dekh ke rindān-e-kuhan baiThe hue haiñ

ġham kyā hai jo saaqī tirā mai-ḳhāna nayā hai

ab dil kī jagah phuul chaḌhāte haiñ butoñ par

is daur meñ dastūr-e-sanam-ḳhāna nayā hai

dāmān-e-tabassum meñ huā jazb har aañsū

ab ālam-e-lutf-e-ġham-e-jānāna nayā hai

karte haiñ salām aur baḌe andāz se 'jauhar'

yāroñ kā mire tarz-e-harīfāna nayā hai

ye silsila-e-shoKHi-e-jaanana naya hai

irshad hua hai ki ye diwana naya hai

matlab to hai is se ki hai mai kitni purani

is se hamein kya kaam ki paimana naya hai

aaina-e-tajdid hai tariKH-e-mohabbat

jis daur mein bhi suniye ye afsana naya hai

kis dhoke mein ho tum use kyon chheD rahe ho

zanjir purani sahi diwana naya hai

aata hai bahut der mein laghzish ka saliqa

saqi se abhi shaiKH ka yarana naya hai

ai sham' teri sozish-e-derina ki ho KHair

kuchh aaj mazaq-e-gham-e-parwana naya hai

ek 'umr ke baad ab hua andaza-e-wahshat

jab us ne kaha mera ye diwana naya hai

ye dekh ke rindan-e-kuhan baiThe hue hain

gham kya hai jo saqi tera mai-KHana naya hai

ab dil ki jagah phul chaDhate hain buton par

is daur mein dastur-e-sanam-KHana naya hai

daman-e-tabassum mein hua jazb har aansu

ab aalam-e-lutf-e-gham-e-jaanana naya hai

karte hain salam aur baDe andaz se 'jauhar'

yaron ka mere tarz-e-harifana naya hai