ye silsila ghamon ka na jaane kahan se hai

ye silsila ġhamoñ kā na jaane kahāñ se hai

ahl-e-zamīñ ko shikva magar āsmāñ se hai

yādoñ kī rahguzār se ḳhvāboñ ke shahr tak

ik silsila zarūr hai lekin kahāñ se hai

merī kitāb-e-zīst ko aise na pheñkiye

raushan kisī kā naam isī dāstāñ se hai

manzil na paa.ī maiñ ne magar ye to khul gayā

rishta mire safar kā kisī kārvāñ se hai

mausam kī her-pher ne sābit ye kar diyā

kuchh mere jism kā bhī ta.alluq makāñ se hai

kahne ko log kyā nahīñ kahte 'shakīl' ko

sunñe kā ishtiyāq tumhārī zabāñ se hai

ye silsila ghamon ka na jaane kahan se hai

ahl-e-zamin ko shikwa magar aasman se hai

yaadon ki rahguzar se KHwabon ke shahr tak

ek silsila zarur hai lekin kahan se hai

meri kitab-e-zist ko aise na phenkiye

raushan kisi ka nam isi dastan se hai

manzil na pai main ne magar ye to khul gaya

rishta mere safar ka kisi karwan se hai

mausam ki her-pher ne sabit ye kar diya

kuchh mere jism ka bhi talluq makan se hai

kahne ko log kya nahin kahte 'shakil' ko

sunne ka ishtiyaq tumhaari zaban se hai