ye socha hi na tha humne ki yun qadr-e-hunar hogi

ye sochā hī na thā ham ne ki yuuñ qadr-e-hunar hogī

hamāre ghar kī pahre-dār taftīshī ḳhabar hogī

zamīñ bhī tang hotī jā rahī hai uḌne vāloñ par

bhalā kyā aur is se baḌh ke tauhīn-e-bashar hogī

na.e manzar na.ī ḳhushiyoñ kā muzhda le ke ubhreñge

chale aao na.e andāz se zauq-e-nazar hogī

kabhī sochā na thā chup-chāp jhoñke yuuñ bhī guzreñge

na kaliyoñ ko ḳhabar hogī na phūloñ ko ḳhabar hogī

bhalā shab ke musāfir kā bhī koī saath detā hai

ab aise mausamoñ ke saath kyā apnī basar hogī

hameñ in bārishoñ se koī samjhautā to karnā hai

ye Thahrāv rahā to apnī manzil kaise sar hogī

havā.eñ ḳhushbuoñ kā saath ab detī nahīñ 'nāshir'

hamārī mausamoñ ke saath phir kyūñkar guzar hogī

ye socha hi na tha hum ne ki yun qadr-e-hunar hogi

hamare ghar ki pahre-dar taftishi KHabar hogi

zamin bhi tang hoti ja rahi hai uDne walon par

bhala kya aur is se baDh ke tauhin-e-bashar hogi

nae manzar nai KHushiyon ka muzhda le ke ubhrenge

chale aao nae andaz se zauq-e-nazar hogi

kabhi socha na tha chup-chap jhonke yun bhi guzrenge

na kaliyon ko KHabar hogi na phulon ko KHabar hogi

bhala shab ke musafir ka bhi koi sath deta hai

ab aise mausamon ke sath kya apni basar hogi

hamein in barishon se koi samjhauta to karna hai

ye Thahraw raha to apni manzil kaise sar hogi

hawaen KHushbuon ka sath ab deti nahin 'nashir'

hamari mausamon ke sath phir kyunkar guzar hogi