ye sumbul-o-nasrin mere hain ye sehn-e-gulistan mera hai

ye sumbul-o-nasrīñ mere haiñ ye sehn-e-gulistāñ merā hai

maiñ azm-e-numū-e-gulshan huuñ in.ām-e-bahārāñ merā hai

maiñ farq batā.ūñ kis kis ko ehsās kī jab taufīq nahīñ

kaif-e-ġham-e-daurāñ merā hai lutf-e-ġham-e-jānāñ merā hai

ai mausam-e-gul tashvīsh na kar arbāb-e-ḳhirad kī bātoñ par

ye panja-e-vahshat mere haiñ har tār-e-garebāñ merā hai

ahbāb tabāhī par merī maġhmūm na hoñ mātam na kareñ

ye gardish-e-daurāñ merī hai vo fitna-e-daurāñ merā hai

ai nāseh-e-mushfiq! rahne de ashkoñ pe mire tanqīd na kar

ye dīda-e-giryāñ mere haiñ vo gosha-e-dāmāñ merā hai

tārīḳh-e-chaman likhne ke liye kyuuñ haath baḌhe haiñ gulchīñ ke

āġhāz-e-gulistāñ merā thā anjām-e-gulistāñ merā hai

shikvoñ kī zafar-yābī pe mujhe ahbāb mubārakbād na deñ

vo nīchī nigāheñ merī haiñ vo husn-e-pashīmāñ merā hai

ye sumbul-o-nasrin mere hain ye sehn-e-gulistan mera hai

main azm-e-numu-e-gulshan hun inam-e-bahaaran mera hai

main farq bataun kis kis ko ehsas ki jab taufiq nahin

kaif-e-gham-e-dauran mera hai lutf-e-gham-e-jaanan mera hai

ai mausam-e-gul tashwish na kar arbab-e-KHirad ki baaton par

ye panja-e-wahshat mere hain har tar-e-gareban mera hai

ahbab tabahi par meri maghmum na hon matam na karen

ye gardish-e-dauran meri hai wo fitna-e-dauran mera hai

ai naseh-e-mushfiq! rahne de ashkon pe mere tanqid na kar

ye dida-e-giryan mere hain wo gosha-e-daman mera hai

tariKH-e-chaman likhne ke liye kyun hath baDhe hain gulchin ke

aaghaz-e-gulistan mera tha anjam-e-gulistan mera hai

shikwon ki zafar-yabi pe mujhe ahbab mubarakbaad na den

wo nichi nigahen meri hain wo husn-e-pashiman mera hai