ye sun ke maqtal ko ja rahe hain ki aaj qissa tamam hoga

ye sun ke maqtal ko jā rahe haiñ ki aaj qissa tamām hogā

yahī to hogā na jaan leñge hamārā is meñ bhī kaam hogā

na dil ko yaarā na tāb-o-tāqat bayān kyā ho zabāñ se hālat

kabhī to āshiq pe ho ināyat firāq meñ ye tamām hogā

tumhārī zulfoñ kī ham ko ulfat baḌhā.egī dil meñ itnī vahshat

ye kyā ḳhabar thī ki ban ke majnūñ hamārā ban-ban qayām hogā

hameñ hai kaafī vo chashm-e-mai-gūñ usī kī dhun meñ jigar hai pur-ḳhūñ

na ḳhum kī ḳhvāhish na hai subū kī bilā piye apnā kaam hogā

kahūñ maiñ kis se ab haal dil kā sambhālegā kaun is ko aa kar

nahīñ hai ġhairoñ se un ko fursat ġharīb yūñhī tamām hogā

sitam karo jis qadar bhī chāho hamārā nuqsān kuchh nahīñ hai

kaheñge sab pur-jafā tumhīñ ko tumhārā mash.hūr naam hogā

yahī hai 'āfāq' dil kī hasrat nazar se dekheñ kisī kā jalvā

isī tamannā meñ jaan deñge kabhī to dīdār-e-ām hogā

ye sun ke maqtal ko ja rahe hain ki aaj qissa tamam hoga

yahi to hoga na jaan lenge hamara is mein bhi kaam hoga

na dil ko yara na tab-o-taqat bayan kya ho zaban se haalat

kabhi to aashiq pe ho inayat firaq mein ye tamam hoga

tumhaari zulfon ki hum ko ulfat baDhaegi dil mein itni wahshat

ye kya KHabar thi ki ban ke majnun hamara ban-ban qayam hoga

hamein hai kafi wo chashm-e-mai-gun usi ki dhun mein jigar hai pur-KHun

na KHum ki KHwahish na hai subu ki bila piye apna kaam hoga

kahun main kis se ab haal dil ka sambhaalega kaun is ko aa kar

nahin hai ghairon se un ko fursat gharib yunhi tamam hoga

sitam karo jis qadar bhi chaho hamara nuqsan kuchh nahin hai

kahenge sab pur-jafa tumhin ko tumhaara mashhur nam hoga

yahi hai 'afaq' dil ki hasrat nazar se dekhen kisi ka jalwa

isi tamanna mein jaan denge kabhi to didar-e-am hoga