ye surmai aafaq ye shamon ke dhundalke

ye surma.ī āfāq ye sham.oñ ke dhundalke

aa jaao bhī yādoñ ke jharokoñ se nikal ke

dīvāne chale aate haiñ sahrā se nikal ke

rakh deñ na kahīñ nazm-e-gulistāñ hī badal ke

phūloñ kī tarah un kī hifāzat hai zarūrī

ye aaj ke bachche hī baḌe hote haiñ kal ke

hai jab to tahammul ki koī aah na nikle

ik ashk kā qatra mirī palkoñ se na Dhalke

do roTiyāñ izzat se jo mil jaa.eñ to bas hai

darvāze pe le jaa.e na vaqt ahl-e-duval ke

jaa.eñ to kahāñ jaa.eñ tire chāhne vaale

hālāt ke tapte hue sahrā se nikal ke

ham dast-darāzī ke to qaa.il nahīñ saaqī

hisse meñ hamāre bhī agar mai ho to chhalke

fankār kī muñh boltī tasvīr hai fan bhī

tum kyā ho batā dete haiñ ash.ār ġhazal ke

kaafī hai hamāre liye miTTī ke gharauñde

ham ḳhāk-basar ahl nahīñ 'tāj' mahal ke

ye surmai aafaq ye shamon ke dhundalke

aa jao bhi yaadon ke jharokon se nikal ke

diwane chale aate hain sahra se nikal ke

rakh den na kahin nazm-e-gulistan hi badal ke

phulon ki tarah un ki hifazat hai zaruri

ye aaj ke bachche hi baDe hote hain kal ke

hai jab to tahammul ki koi aah na nikle

ek ashk ka qatra meri palkon se na Dhalke

do roTiyan izzat se jo mil jaen to bas hai

darwaze pe le jae na waqt ahl-e-duwal ke

jaen to kahan jaen tere chahne wale

haalat ke tapte hue sahra se nikal ke

hum dast-daraazi ke to qail nahin saqi

hisse mein hamare bhi agar mai ho to chhalke

fankar ki munh bolti taswir hai fan bhi

tum kya ho bata dete hain ashaar ghazal ke

kafi hai hamare liye miTTi ke gharaunde

hum KHak-basar ahl nahin 'taj' mahal ke