ye tai hua hai ki qatil ko bhi dua dije

ye tai huā hai ki qātil ko bhī duā diije

ḳhud apnā ḳhuun bahā phir bhī ḳhūñ-bahā diije

niyāz-o-nāz bajā haiñ magar ye shart-e-visāl

hai sañg-e-rāh-e-ta.alluq ise haTā diije

sunā thā ham ne ki manzil qarīb aa pahuñchī

kahāñ haiñ aap agar ho sake sadā diije

sahar qarīb sahī phir bhī kuchh ba.iid nahīñ

charāġh bujhne lage haiñ to lau baḌhā diije

mahakte zaḳhmoñ ko in.ām-e-fasl-e-gul kahiye

sulag uThe jo chaman barq ko duā diije

kuchh is tarah hai ki guzre haiñ jis qayāmat se

samjhiye ḳhvāb use ḳhvāb ko bhulā diije

badal ga.e haiñ taqāze suḳhan-shanāsī ke

udhar atā ho idhar daad barmalā diije

ye kyā zarūr ki ehsās ko zabāñ mil jaa.e

hai hukm-e-naġhma-sarā.ī to gungunā diije

ye tai hua hai ki qatil ko bhi dua dije

KHud apna KHun baha phir bhi KHun-baha dije

niyaz-o-naz baja hain magar ye shart-e-visal

hai sang-e-rah-e-talluq ise haTa dije

suna tha hum ne ki manzil qarib aa pahunchi

kahan hain aap agar ho sake sada dije

sahar qarib sahi phir bhi kuchh baid nahin

charagh bujhne lage hain to lau baDha dije

mahakte zaKHmon ko inam-e-fasl-e-gul kahiye

sulag uThe jo chaman barq ko dua dije

kuchh is tarah hai ki guzre hain jis qayamat se

samjhiye KHwab use KHwab ko bhula dije

badal gae hain taqaze suKHan-shanasi ke

udhar ata ho idhar dad barmala dije

ye kya zarur ki ehsas ko zaban mil jae

hai hukm-e-naghma-sarai to gunguna dije