ye takalluf ye mudaraat samajh mein aae

ye takalluf ye mudārāt samajh meñ aa.e

ho judā.ī to mulāqāt samajh meñ aa.e

ruuh kī pyaas phuvāroñ se kahīñ bujhtī hai

TuuT ke barse to barsāt samajh meñ aa.e

jāgte lab mire aur us kī jhapaktī āñkheñ

niiñd aa.e to kahāñ baat samajh meñ aa.e

lī thī mauhūm tahaffuz ke gharauñde meñ panāh

ret jab bikhrī to hālāt samajh meñ aa.e

uñgliyāñ jism ke sab aib-o-hunar jāntī haiñ

lams jaage to ik ik baat samajh meñ aa.e

saikḌoñ haath mire qatl meñ Thahre haiñ sharīk

ek do hoñ to koī baat samajh meñ aa.e

kabhī utrā hī nahīñ us ke takalluf kā libās

ho barahna to mulāqāt samajh meñ aa.e

koī āsāñ nahīñ jal jal ke sahar kar lenā

sham.a ban jaao to phir raat samajh meñ aa.e

tum kisī ret ke Tiile pe khaḌe ho 'ibrat'

uTThe tūfāñ to phir auqāt samajh meñ aa.e

ye takalluf ye mudaraat samajh mein aae

ho judai to mulaqat samajh mein aae

ruh ki pyas phuwaron se kahin bujhti hai

TuT ke barse to barsat samajh mein aae

jagte lab mere aur us ki jhapakti aankhen

nind aae to kahan baat samajh mein aae

li thi mauhum tahaffuz ke gharaunde mein panah

ret jab bikhri to haalat samajh mein aae

ungliyan jism ke sab aib-o-hunar jaanti hain

lams jage to ek ek baat samajh mein aae

saikDon hath mere qatl mein Thahre hain sharik

ek do hon to koi baat samajh mein aae

kabhi utra hi nahin us ke takalluf ka libas

ho barahna to mulaqat samajh mein aae

koi aasan nahin jal jal ke sahar kar lena

shama ban jao to phir raat samajh mein aae

tum kisi ret ke Tile pe khaDe ho 'ibrat'

uTThe tufan to phir auqat samajh mein aae