ye tamam ghuncha-o-gul main hansun to muskuraen

ye tamām ġhuncha-o-gul maiñ hañsūñ to muskurā.eñ

kabhī yak-ba-yak jo ro duuñ to sitāre TuuT jaa.eñ

mire dāġh-e-dil kī tābish jo kabhī ye dekh paa.eñ

vahīñ rashk-e-be-amāñ se mah-o-mehr Duub jaa.eñ

kabhī zauq-e-justujū par agar e.atibār kar luuñ

sar-e-rāh manzileñ ḳhud mujhe DhūñDne ko aa.eñ

kabhī be-qarār ho kar jo maiñ sāz-e-ishq chheḌūñ

to ye mushtarī-o-zohra koī giit phir na gaa.eñ

mirā zauq mai-parastī hai kuchh is qadar mukammal

jo maiñ jām-e-mai uThā luuñ to baras paḌeñ ghaTā.eñ

sar-e-mai-kada jo dekheñ mirī mai-kashī kā manzar

hoñ shuyūḳh sar-ba-sajda kare zāhid iltijā.eñ

ye tamam ghuncha-o-gul main hansun to muskuraen

kabhi yak-ba-yak jo ro dun to sitare TuT jaen

mere dagh-e-dil ki tabish jo kabhi ye dekh paen

wahin rashk-e-be-aman se mah-o-mehr Dub jaen

kabhi zauq-e-justuju par agar eatibar kar lun

sar-e-rah manzilen KHud mujhe DhunDne ko aaen

kabhi be-qarar ho kar jo main saz-e-ishq chheDun

to ye mushtari-o-zohra koi git phir na gaen

mera zauq mai-parasti hai kuchh is qadar mukammal

jo main jam-e-mai uTha lun to baras paDen ghaTaen

sar-e-mai-kada jo dekhen meri mai-kashi ka manzar

hon shuyuKH sar-ba-sajda kare zahid iltijaen