ye tark KHatm ho gaya guzri sadi ke sath

ye tark ḳhatm ho gayā guzrī sadī ke saath

milte nahīñ haiñ dost kabhī dushmanī ke saath

farmān sach ko jhuuT mujhe bolne kā thā

lekin dikhāyā aa.ina zinda-dilī ke saath

duniyā badal rahī hai yahī sun rahe haiñ ham

kyā is liye hī rahte nahīñ sādgī ke saath

bachchoñ ko Tokne kā zamāna nahīñ rahā

māñ-bāp jī rahe haiñ baḌī bebasī ke saath

sūraj kī raushnī meñ charāġhoñ ko rakh diyā

ye imtihān ḳhuub huā muflisī ke saath

bebāk bolne kā ye in'ām mil gayā

guzrī tamām 'umr mirī be-ruḳhī ke saath

kahne ko kaan sab ke haiñ suntā nahīñ koī

aise meñ sun rahe haiñ mujhe ḳhāmushī ke saath

ye tark KHatm ho gaya guzri sadi ke sath

milte nahin hain dost kabhi dushmani ke sath

farman sach ko jhuT mujhe bolne ka tha

lekin dikhaya aaina zinda-dili ke sath

duniya badal rahi hai yahi sun rahe hain hum

kya is liye hi rahte nahin sadgi ke sath

bachchon ko Tokne ka zamana nahin raha

man-bap ji rahe hain baDi bebasi ke sath

suraj ki raushni mein charaghon ko rakh diya

ye imtihan KHub hua muflisi ke sath

bebak bolne ka ye in'am mil gaya

guzri tamam 'umr meri be-ruKHi ke sath

kahne ko kan sab ke hain sunta nahin koi

aise mein sun rahe hain mujhe KHamushi ke sath