ye tasalli ye dilasa ye sahaara naTak

ye tasallī ye dilāsa ye sahārā nāTak

kitnā pyārā hai mire yaar tumhārā nāTak

dard sahne kī aziyyat se guzāreñ tum ko

ham bhī dikhlā.eñ kisī roz karārā nāTak

band kar dījiye bandoñ ko milānā rab se

band kar dījiye ab apnā ḳhudārā nāTak

ek jaise haiñ tire aur mire ġham jānāñ

ek jaisā hai tirā aur hamārā nāTak

us kī āñkhoñ se gire ashk to motī ho jaa.eñ

merī āñkhoñ se chhalaktā huā taarā nāTak

ham adākār to chalte the hidāyat le kar

apnī marzī se kahāñ ham ne guzārā nāTak

lahlahāte hue bāġhāt sukūñ amn-o-amāñ

ek tasvīr meñ dekhā gayā saarā nāTak

ye to ham haiñ jo tumheñ sar pe chaḌhā rakkhā hai

varna kis ko hai mirī jaan gavārā nāTak

uñgliyāñ kis kī haiñ 'ārif' jo nachātī haiñ hameñ

ḳhud samajh aayā nahīñ ham ko hamārā nāTak

ye tasalli ye dilasa ye sahaara naTak

kitna pyara hai mere yar tumhaara naTak

dard sahne ki aziyyat se guzaren tum ko

hum bhi dikhlaen kisi roz karara naTak

band kar dijiye bandon ko milana rab se

band kar dijiye ab apna KHudara naTak

ek jaise hain tere aur mere gham jaanan

ek jaisa hai tera aur hamara naTak

us ki aankhon se gire ashk to moti ho jaen

meri aankhon se chhalakta hua tara naTak

hum adakar to chalte the hidayat le kar

apni marzi se kahan hum ne guzara naTak

lahlahate hue baghat sukun amn-o-aman

ek taswir mein dekha gaya sara naTak

ye to hum hain jo tumhein sar pe chaDha rakkha hai

warna kis ko hai meri jaan gawara naTak

ungliyan kis ki hain 'arif' jo nachati hain hamein

KHud samajh aaya nahin hum ko hamara naTak