ye tera KHayal hai ki tu hai

ye terā ḳhayāl hai ki tū hai

jo kuchh bhī hai merī aarzū hai

dil pahlū meñ jal rahā hai jaise

ye kaisī bahār-e-rañg-o-bū hai

taqdīr meñ shab likhī ga.ī thī

kahne ko ye zulf-e-mushkbū hai

vo dast-e-ḳhizāñ se bach gayā hai

jis phuul meñ rañg hai na bū hai

patthar ko tarāsh kar bhī dekho

ye fan bhī ḳhudā kī justujū hai

pardes hai shahr shahr merā

aġhyār kī jis meñ aabrū hai

taqdīs ke sar meñ ḳhaak dekhī

tahzīb ke haath meñ subū hai

maiñ jiine se tañg aa gayā huuñ

ai maut subūt de ki tū hai

dekho to 'zafar' kahāñ hai yaaro

dīvāne kā zikr kū-ba-kū hai

ye tera KHayal hai ki tu hai

jo kuchh bhi hai meri aarzu hai

dil pahlu mein jal raha hai jaise

ye kaisi bahaar-e-rang-o-bu hai

taqdir mein shab likhi gai thi

kahne ko ye zulf-e-mushkbu hai

wo dast-e-KHizan se bach gaya hai

jis phul mein rang hai na bu hai

patthar ko tarash kar bhi dekho

ye fan bhi KHuda ki justuju hai

pardes hai shahr shahr mera

aghyar ki jis mein aabru hai

taqdis ke sar mein KHak dekhi

tahzib ke hath mein subu hai

main jine se tang aa gaya hun

ai maut subut de ki tu hai

dekho to 'zafar' kahan hai yaro

diwane ka zikr ku-ba-ku hai