ye teri yaad hai tera KHayal hai kya hai

ye terī yaad hai terā ḳhayāl hai kyā hai

añdherī raat hai phir bhī bahut ujālā hai

vafā fareb hai 'ejāz' ishq dhokā hai

binā ġharaz ke yahāñ kaun kis se miltā hai

ġhamoñ ne chehrā kuchh itnā bigāḌ rakkhā hai

ki aa.ina ho muqābil to ḳhauf aatā hai

badan hai shāḳh kī mānind gul sā chehra hai

hamārī jāgtī āñkhoñ ne kis ko dekhā hai

ġharaz-parast mohabbat kī baat karne lage

na jaane aaj kā sūraj kidhar se niklā hai

kabhī sitam bhī tirā pur-kashish nazar aayā

kabhī karam bhī tirā nāgavār guzrā hai

kitāb-e-dil pe zarā ġhaur se nazar Daalo

varaq varaq pe tumhārā hī naam likkhā hai

ye kis kī laash paḌī hai saḌak pe lā-vāris

ye kis kā naam likhā hai ye kis kā basta hai

hai nok-e-neza pe bhī fat.h kī adā 'ejāz'

hamārā sar abhī qātil ke sar se ūñchā hai

ye teri yaad hai tera KHayal hai kya hai

andheri raat hai phir bhi bahut ujala hai

wafa fareb hai 'ejaz' ishq dhoka hai

bina gharaz ke yahan kaun kis se milta hai

ghamon ne chehra kuchh itna bigaD rakkha hai

ki aaina ho muqabil to KHauf aata hai

badan hai shaKH ki manind gul sa chehra hai

hamari jagti aankhon ne kis ko dekha hai

gharaz-parast mohabbat ki baat karne lage

na jaane aaj ka suraj kidhar se nikla hai

kabhi sitam bhi tera pur-kashish nazar aaya

kabhi karam bhi tera nagawar guzra hai

kitab-e-dil pe zara ghaur se nazar Dalo

waraq waraq pe tumhaara hi nam likkha hai

ye kis ki lash paDi hai saDak pe la-waris

ye kis ka nam likha hai ye kis ka basta hai

hai nok-e-neza pe bhi fath ki ada 'ejaz'

hamara sar abhi qatil ke sar se uncha hai