ye to duniya hai zarurat se mila karti hai

ye to duniyā hai zarūrat se milā kartī hai

ek maañ hai jo mire haq meñ du'ā kartī hai

vaqt to phuus pe rakh detā hai ik chingārī

aur baaqī jo bache kaam havā kartī hai

ek tinkā bhī ulajh paḌtā hai tūfānoñ se

izzat-e-nafs har ik shai meñ huā kartī hai

dūsrā kaam nahīñ hai koī us ko shāyad

guftugū apnī ye dīvār sunā kartī hai

mere andar bhī utar jaatī hai gāhe-gāhe

raushnī yuuñ to darīche meñ rahā kartī hai

sub.h hote hī chalī jaa.e khañDar ke andar

zindagī raat ko sahrā meñ phirā kartī hai

merī palkoñ pe Thahar jaatī hai aakar sar-e-shām

chāñdnī roz na.e ḳhvāb bunā kartī hai

vo havā hai ki jo har roz chaman se aakar

ḳhushbueñ shahr meñ taqsīm kiyā kartī hai

raaz ye khul na sakā kis liye āḳhir ai 'nūr'

huuk sī roz mire dil meñ uThā kartī hai

ye to duniya hai zarurat se mila karti hai

ek man hai jo mere haq mein du'a karti hai

waqt to phus pe rakh deta hai ek chingari

aur baqi jo bache kaam hawa karti hai

ek tinka bhi ulajh paDta hai tufanon se

izzat-e-nafs har ek shai mein hua karti hai

dusra kaam nahin hai koi us ko shayad

guftugu apni ye diwar suna karti hai

mere andar bhi utar jati hai gahe-gahe

raushni yun to dariche mein raha karti hai

subh hote hi chali jae khanDar ke andar

zindagi raat ko sahra mein phira karti hai

meri palkon pe Thahar jati hai aakar sar-e-sham

chandni roz nae KHwab buna karti hai

wo hawa hai ki jo har roz chaman se aakar

KHushbuen shahr mein taqsim kiya karti hai

raaz ye khul na saka kis liye aaKHir ai 'nur'

huk si roz mere dil mein uTha karti hai