ye to hum kah nahin sakte wo ham-aghosh raha

ye to ham kah nahīñ sakte vo ham-āġhosh rahā

haañ magar dil meñ hamāre koī rū-posh rahā

chhā gayā bazm meñ saaqī kā ye andāz-e-bayāñ

apnī sī kah gayā har ek vo ḳhāmosh rahā

kahte haiñ sach hai hameñ dekh ke be-ḳhud hue tum

TikTikī bāñdh ke dekhā kiye ye hosh rahā

kah diyā āñkhoñ ne sab haal hamārā un se

aur jis dil se thī ummīd vo ḳhāmosh rahā

but-kada ho gayā sunsān tire jaane se

umr bhar ḳhāna-e-ka.aba bhī siyah-posh rahā

chāhne vāloñ kā chun chun ke kiyā kaam tamām

bār-e-ulfat se hamesha vo subuk-dosh rahā

sab kī ulfat se to inkār kiyā us ne magar

'mast' kā naam jab aaya to vo ḳhāmosh rahā

ye to hum kah nahin sakte wo ham-aghosh raha

han magar dil mein hamare koi ru-posh raha

chha gaya bazm mein saqi ka ye andaz-e-bayan

apni si kah gaya har ek wo KHamosh raha

kahte hain sach hai hamein dekh ke be-KHud hue tum

TikTiki bandh ke dekha kiye ye hosh raha

kah diya aankhon ne sab haal hamara un se

aur jis dil se thi ummid wo KHamosh raha

but-kada ho gaya sunsan tere jaane se

umr bhar KHana-e-kaba bhi siyah-posh raha

chahne walon ka chun chun ke kiya kaam tamam

bar-e-ulfat se hamesha wo subuk-dosh raha

sab ki ulfat se to inkar kiya us ne magar

'mast' ka nam jab aaya to wo KHamosh raha