ye to koi nahin samjha ki tamasha kya hai

ye to koī nahīñ samjhā ki tamāshā kyā hai

ik hasīñ ḳhvāb hai bas aur ye duniyā kyā hai

ye batā de ki yahāñ tere 'alāva kyā hai

dil bhī terā hai tirī jaañ bhī hamārā kyā hai

hosh rahtā hī nahīñ 'ishq meñ aisā kyā hai

aur na ho 'ishq to phir ziist meñ rakkhā kyā hai

tū na hotā to mo'amma kā koī hal hī na thā

maqsad-e-zīst hai kyā hāsil-e-duniyā kyā hai

ye alag baat tirā naam to sab lete haiñ

ye alag baat tire naam pe hotā kyā hai

merī puujā hai parastish hai tapasyā hai tū

tujh ko mā'lūm nahīñ merī tamanna kyā hai

aaj qismat ne milāyā hai to āñkheñ na churā

aatī jaatī huī sāñsoñ kā bharosa kyā hai

vo to maazī kī tarah chhoḌ gayā hai mujh ko

zindagī ab ye batā terā irāda kyā hai

sone aur chāñdī kī ḳhvāhish to burī baat nahīñ

pahle ye soch lo 'gulshan' ki zamāna kyā hai

ye to koi nahin samjha ki tamasha kya hai

ek hasin KHwab hai bas aur ye duniya kya hai

ye bata de ki yahan tere 'alawa kya hai

dil bhi tera hai teri jaan bhi hamara kya hai

hosh rahta hi nahin 'ishq mein aisa kya hai

aur na ho 'ishq to phir zist mein rakkha kya hai

tu na hota to mo'amma ka koi hal hi na tha

maqsad-e-zist hai kya hasil-e-duniya kya hai

ye alag baat tera nam to sab lete hain

ye alag baat tere nam pe hota kya hai

meri puja hai parastish hai tapasya hai tu

tujh ko ma'lum nahin meri tamanna kya hai

aaj qismat ne milaya hai to aankhen na chura

aati jati hui sanson ka bharosa kya hai

wo to mazi ki tarah chhoD gaya hai mujh ko

zindagi ab ye bata tera irada kya hai

sone aur chandi ki KHwahish to buri baat nahin

pahle ye soch lo 'gulshan' ki zamana kya hai