ye tum se kaun kahta hai mulaqaten nahin achchhi

ye tum se kaun kahtā hai mulāqāteñ nahīñ achchhī

magar yuuñ der tak ġhairoñ ke ghar bāteñ nahīñ achchhī

vahī bāteñ jo achchhī haiñ vahī bāteñ nahīñ achchhī

dil-e-tanhā ko bhīgī chāñdnī rāteñ nahīñ achchhī

fazā-e-husn ik rangīñ taqāzā hī sahī lekin

bharī mahfil meñ phir bhī pyaar kī bāteñ nahīñ achchhī

kabhī ik sho.ala-e-uryāñ kabhī yād-e-qad-e-rā.anā

tirī nisbat se apnī kaun sī rāteñ nahīñ achchhī

baroz-e-eid un ke sāmne dil kaun le jaa.e

hujūm-e-ām kī zad meñ mulāqāteñ nahīñ achchhī

nazar lipTī chalī jaatī hai ik sarv-e-ḳhirāmāñ se

shikast-e-ārzū kahtī hai ye bāteñ nahīñ achchhī

hasīñ āñkhoñ meñ sail-e-ashk-e-ġham par dil laraztā hai

na.e phūloñ ko itnī saḳht barsāteñ nahīñ achchhī

vo likhte haiñ yahāñ tāḳhīr-e-ḳhat kuchh ho hī jaatī hai

magar dehlī se is andāz kī bāteñ nahīñ achchhī

ye harf-e-talḳh 'saifī' halqa-e-ahbāb tak pahuñche

ba-qaid-e-maslahat hargiz mulāqāteñ nahīñ achchhī

ye tum se kaun kahta hai mulaqaten nahin achchhi

magar yun der tak ghairon ke ghar baaten nahin achchhi

wahi baaten jo achchhi hain wahi baaten nahin achchhi

dil-e-tanha ko bhigi chandni raaten nahin achchhi

faza-e-husn ek rangin taqaza hi sahi lekin

bhari mahfil mein phir bhi pyar ki baaten nahin achchhi

kabhi ek shoala-e-uryan kabhi yaad-e-qad-e-raana

teri nisbat se apni kaun si raaten nahin achchhi

baroz-e-eid un ke samne dil kaun le jae

hujum-e-am ki zad mein mulaqaten nahin achchhi

nazar lipTi chali jati hai ek sarw-e-KHiraman se

shikast-e-arzu kahti hai ye baaten nahin achchhi

hasin aankhon mein sail-e-ashk-e-gham par dil larazta hai

nae phulon ko itni saKHt barsaten nahin achchhi

wo likhte hain yahan taKHir-e-KHat kuchh ho hi jati hai

magar dehli se is andaz ki baaten nahin achchhi

ye harf-e-talKH 'saifi' halqa-e-ahbab tak pahunche

ba-qaid-e-maslahat hargiz mulaqaten nahin achchhi