ye ujala har ek shai ko chamka gaya

ye ujālā har ik shai ko chamkā gayā

aa.ina dil kā kuchh aur dhuñdlā gayā

aaj maġhmūm hai vo sar-e-ā.īna

zulf uljhī to merā ḳhayāl aa gayā

apnī barbādiyoñ kā mujhe ġham nahīñ

ġham ye hai kis tarah tujh se dekhā gayā

itnī fursat kahāñ thī ki ham sochte

'ishq meñ kyā huaa, kyā milā, kyā gayā

luT gayā johd-e-hastī meñ ehsās bhī

zindagī ke liye haa.e kyā kyā gayā

jis ke hoñToñ ke dāman meñ kuchh bhī na thā

jab uThā bazm se giit barsā gayā

ye ujala har ek shai ko chamka gaya

aaina dil ka kuchh aur dhundla gaya

aaj maghmum hai wo sar-e-aina

zulf uljhi to mera KHayal aa gaya

apni barbaadiyon ka mujhe gham nahin

gham ye hai kis tarah tujh se dekha gaya

itni fursat kahan thi ki hum sochte

'ishq mein kya hua, kya mila, kya gaya

luT gaya johd-e-hasti mein ehsas bhi

zindagi ke liye hae kya kya gaya

jis ke honTon ke daman mein kuchh bhi na tha

jab uTha bazm se git barsa gaya