ye unki gali hai baad-e-saba aahista guzar aahista guzar

ye un kī galī hai bād-e-sabā āhista guzar āhista guzar

ye rāh-e-vafā hai rāh-e-vafā āhista guzar āhista guzar

ai rah-rav-e-ulfat aa pahuñchī vo shahr-e-nigārāñ kī sarhad

aatī hai shikast-e-dil kī sadā āhista guzar āhista guzar

ai nik.hat-e-gul is mahfil meñ āzurda na ho āzurda na ho

miltī hai yahāñ ḳhushbu-e-vafā āhista guzar āhista guzar

do phuul chaḌhā yā ashk bahā kuchh farq nahīñ paḌtā sāthī

chaltī hai yahīñ se rasm-e-vafā āhista guzar āhista guzar

ai abr-e-siyah itnā na machal chalnā hai to dhīre dhīre chal

vo sāmne hai zulfoñ kī ghaTā āhista guzar āhista guzar

ai mahram-e-ḳhalvat mauj-e-sabā jazbāt-e-mohabbat aam na kar

ho jaa.e na gul phir sham-e-vafā āhista guzar āhista guzar

kitne hī patange jalte haiñ be-nām sahī gumnām sahī

ai rasm-e-mohabbat dekh zarā āhista guzar āhista guzar

mānūs bhī huuñ mānūs nahīñ āvāz ye kis kī hai 'nayyar'

kānoñ meñ kabhī aatī hai sadā āhista guzar āhista guzar

ye un ki gali hai baad-e-saba aahista guzar aahista guzar

ye rah-e-wafa hai rah-e-wafa aahista guzar aahista guzar

ai rah-raw-e-ulfat aa pahunchi wo shahr-e-nigaran ki sarhad

aati hai shikast-e-dil ki sada aahista guzar aahista guzar

ai nikhat-e-gul is mahfil mein aazurda na ho aazurda na ho

milti hai yahan KHushbu-e-wafa aahista guzar aahista guzar

do phul chaDha ya ashk baha kuchh farq nahin paDta sathi

chalti hai yahin se rasm-e-wafa aahista guzar aahista guzar

ai abr-e-siyah itna na machal chalna hai to dhire dhire chal

wo samne hai zulfon ki ghaTa aahista guzar aahista guzar

ai mahram-e-KHalwat mauj-e-saba jazbaat-e-mohabbat aam na kar

ho jae na gul phir sham-e-wafa aahista guzar aahista guzar

kitne hi patange jalte hain be-nam sahi gumnam sahi

ai rasm-e-mohabbat dekh zara aahista guzar aahista guzar

manus bhi hun manus nahin aawaz ye kis ki hai 'nayyar'

kanon mein kabhi aati hai sada aahista guzar aahista guzar