ye waqia kabhi tariKH mein hua to nahin

ye vāqi'a kabhī tārīḳh meñ huā to nahīñ

charāġh-e-'ishq havā se kabhī bujhā to nahīñ

ye log kyoñ mire hone se ḳhud ko dekhte haiñ

ye mujh se ḳhaufzada haiñ maiñ aa.ina to nahīñ

havā-e-tund se mā'dūm ho nahīñ saktā

ye bahr-e-'ishq hai paanī kā bulbulā to nahīñ

jo pīchhe rah gayā samjho vo rah gayā pīchhe

ye zindagī kā safar koī dā.era to nahīñ

ye ranj-o-ġham ye musībat ye dasht-e-tanhā.ī

mire ḳhudā mujhe darpesh karbalā to nahīñ

guzar chukā hai jo manzar vo mere sāmne hai

jo hone vaalā hai vo bhī koī nayā to nahīñ

ye waqi'a kabhi tariKH mein hua to nahin

charagh-e-'ishq hawa se kabhi bujha to nahin

ye log kyon mere hone se KHud ko dekhte hain

ye mujh se KHaufzada hain main aaina to nahin

hawa-e-tund se ma'dum ho nahin sakta

ye bahr-e-'ishq hai pani ka bulbula to nahin

jo pichhe rah gaya samjho wo rah gaya pichhe

ye zindagi ka safar koi daera to nahin

ye ranj-o-gham ye musibat ye dasht-e-tanhai

mere KHuda mujhe darpesh karbala to nahin

guzar chuka hai jo manzar wo mere samne hai

jo hone wala hai wo bhi koi naya to nahin