ye waqia to lage hai suna hua sa kuchh

ye vāqi.a to lage hai sunā huā sā kuchh

har ek shaḳhs kahe hai kahā huā sā kuchh

vo gahre gahre sabhī zaḳhm bhar ga.e jab se

nayā sā dard lage hai sahā huā sā kuchh

ye tez o tund havā.eñ uḌā hī le jaa.eñ

agar bachā ke na rakkhūñ bachā huā sā kuchh

karāhne kī sadā.eñ bhī ab nahīñ ātīñ

tamām shahr lage hai Darā huā sā kuchh

har ek laash meñ kuchh ḳhvāb saañs lete hue

har ik vajūd meñ jaise marā huā sā kuchh

ye ḳhauf hai kahīñ ātish-fishāñ na ban jaa.e

hamāre paañv ke nīche dabā huā sā kuchh

ye waqia to lage hai suna hua sa kuchh

har ek shaKHs kahe hai kaha hua sa kuchh

wo gahre gahre sabhi zaKHm bhar gae jab se

naya sa dard lage hai saha hua sa kuchh

ye tez o tund hawaen uDa hi le jaen

agar bacha ke na rakkhun bacha hua sa kuchh

karahne ki sadaen bhi ab nahin aatin

tamam shahr lage hai Dara hua sa kuchh

har ek lash mein kuchh KHwab sans lete hue

har ek wajud mein jaise mara hua sa kuchh

ye KHauf hai kahin aatish-fishan na ban jae

hamare panw ke niche daba hua sa kuchh