ye wahm hai mera ki haqiqat mein mila hai

ye vahm hai merā ki haqīqat meñ milā hai

ḳhurshīd mujhe vādi-e-zulmat meñ milā hai

shāmil mirī tahzīb meñ hai haq kī himāyat

andāz-e-baġhāvat kā virāsat meñ milā hai

tā-umr rifāqat kī qasam khaa.ī thī jis ne

bichhḌā hai to phir mujh ko qayāmat meñ milā hai

rukte hī qadam paañv pakaḌ leñ na masā.il

har shaḳhs isī ḳhauf se ujlat meñ milā hai

kuchh aur Thahar jaao sar-e-kū-e-tamannā

ye hukm mujhe lamha-e-hijrat meñ milā hai

ādāb kiyā jaa.e kise kitne adab se

ye fan mujhe barsoñ kī riyāzat meñ milā hai

sayyād ne lagtā hai ki fitrat hī badal dī

har phuul mujhe ḳhaar kī sūrat meñ milā hai

ye wahm hai mera ki haqiqat mein mila hai

KHurshid mujhe wadi-e-zulmat mein mila hai

shamil meri tahzib mein hai haq ki himayat

andaz-e-baghawat ka wirasat mein mila hai

ta-umr rifaqat ki qasam khai thi jis ne

bichhDa hai to phir mujh ko qayamat mein mila hai

rukte hi qadam panw pakaD len na masail

har shaKHs isi KHauf se ujlat mein mila hai

kuchh aur Thahar jao sar-e-ku-e-tamanna

ye hukm mujhe lamha-e-hijrat mein mila hai

aadab kiya jae kise kitne adab se

ye fan mujhe barson ki riyazat mein mila hai

sayyaad ne lagta hai ki fitrat hi badal di

har phul mujhe KHar ki surat mein mila hai