ye waqt ka taqaza hai khul kar jawab dun

ye vaqt kā taqāza hai khul kar javāb duuñ

sab saañp āstīn ke pairoñ se daab duuñ

mujh ko chalā rahā hai vo apne hisāb se

aur ye bhī chāhtā hai ki us ko hisāb duuñ

ḳhvāboñ meñ kar rahā hai bhalā kaun ye savāl

uTh kar maiñ sochtā huuñ ki kis ko javāb duuñ

ho kar maiñ tere saath jab āzād ho gayā

duniyā ke in savāloñ kā ab kyā javāb duuñ

ho jā.ūñ gar ḳhudā maiñ jo ik roz ke liye

jo log doġhle haiñ sabhī ko 'azāb duuñ

jo log mar ga.e haiñ zamāne meñ jīte-jī

jiine kā un ko kyoñ na hasīñ koī ḳhvāb duuñ

'mas'ūd' mai-kade se maiñ jaane lagā thā ghar

itne meñ sāqiyā ne kahā aur sharāb duuñ

ye waqt ka taqaza hai khul kar jawab dun

sab sanp aastin ke pairon se dab dun

mujh ko chala raha hai wo apne hisab se

aur ye bhi chahta hai ki us ko hisab dun

KHwabon mein kar raha hai bhala kaun ye sawal

uTh kar main sochta hun ki kis ko jawab dun

ho kar main tere sath jab aazad ho gaya

duniya ke in sawalon ka ab kya jawab dun

ho jaun gar KHuda main jo ek roz ke liye

jo log doghle hain sabhi ko 'azab dun

jo log mar gae hain zamane mein jite-ji

jine ka un ko kyon na hasin koi KHwab dun

'mas'ud' mai-kade se main jaane laga tha ghar

itne mein saqiya ne kaha aur sharab dun