ye waza-e-qaumiyat aainda ruKHsat hone wali hai

ye vaz.a-e-qaumiyat ā.inda ruḳhsat hone vaalī hai

na.ī tahzīb se tajdīd-e-millat hone vaalī hai

shab-e-lazzat hai āḳhir aur mahfil uThtī jaatī hai

sahar kyā hone vaalī hai qayāmat hone vaalī hai

na.e sāmān-e-ārā.ish farāham hote jaate haiñ

farāham kyoñ na hoñ un kī zarūrat hone vaalī hai

gramophone par bechāra mutrib gat bajā.e kyā

vo ḳhud samjhā huā hai us kī jo gat hone vaalī hai

purānī vaz' vaale apnī apnī fikr meñ haiñ sab

ki dekheñ is bharī mahfil meñ kyā gat hone vaalī hai

commission kar rahā hai ġhaur tafrīq-e-mazāhib par

bhalī ho yā burī tarmīm-e-millat hone vaalī hai

koī maane na maane ham to is tarmīm se ḳhush haiñ

agar qaumī parastish juzv-e-millat hone vaalī hai

pile paḌte haiñ hindī is tarah taqlīd-e-europe par

ki goyā in kī europe par hukūmat hone vaalī hai

hamārī sādgī rozāna aisī baḌhtī jaatī hai

ki is kī jald-tar pechīda sūrat hone vaalī hai

hamārī har ġharaz meñ saḳht qaideñ lagtī jaatī haiñ

har āsānī hameñ ā.inda diqqat hone vaalī hai

guzishta azmateñ apnī hameñ sab yaad hoñ lekin

ab un se koī 'izzat koī vaq'at hone vaalī hai

tum ā.īne meñ apne ḳhāl-o-ḳhat kā husn mat dekho

vo sūrat dekho jo ā.inda sūrat hone vaalī hai

shumār ab tak thā chaupāyoñ meñ jis kā us ke baazū ko

par-e-parvāz kī quvvat ‘ināyat hone vaalī hai

bahut kuchh tum taraqqī kar chuke aur karte jaate ho

magar qudrat pe hāsil tum ko qudrat hone vaalī hai

tumheñ me.arāj-e-duniyāvī to hāsil ho chukā aage

taraqqī hone vaalī kyā hai zillat hone vaalī hai

ġharaz duniyā badaltī jā rahī hai aisī tezī se

ki koī din meñ maḳhdūsh is kī sūrat hone vaalī hai

tumheñ kyā soch 'nādir' tum na hoge aur na dekhoge

jo kuchh achchhī burī ā.inda hālat hone vaalī hai

ye waza-e-qaumiyat aainda ruKHsat hone wali hai

nai tahzib se tajdid-e-millat hone wali hai

shab-e-lazzat hai aaKHir aur mahfil uThti jati hai

sahar kya hone wali hai qayamat hone wali hai

nae saman-e-araish faraham hote jate hain

faraham kyon na hon un ki zarurat hone wali hai

gramophone par bechaara mutrib gat bajae kya

wo KHud samjha hua hai us ki jo gat hone wali hai

purani waz' wale apni apni fikr mein hain sab

ki dekhen is bhari mahfil mein kya gat hone wali hai

commission kar raha hai ghaur tafriq-e-mazahib par

bhali ho ya buri tarmim-e-millat hone wali hai

koi mane na mane hum to is tarmim se KHush hain

agar qaumi parastish juzw-e-millat hone wali hai

pile paDte hain hindi is tarah taqlid-e-europe par

ki goya in ki europe par hukumat hone wali hai

hamari sadgi rozana aisi baDhti jati hai

ki is ki jald-tar pechida surat hone wali hai

hamari har gharaz mein saKHt qaiden lagti jati hain

har aasani hamein aainda diqqat hone wali hai

guzishta azmaten apni hamein sab yaad hon lekin

ab un se koi 'izzat koi waq'at hone wali hai

tum aaine mein apne KHal-o-KHat ka husn mat dekho

wo surat dekho jo aainda surat hone wali hai

shumar ab tak tha chaupayon mein jis ka us ke bazu ko

par-e-parwaz ki quwwat ‘inayat hone wali hai

bahut kuchh tum taraqqi kar chuke aur karte jate ho

magar qudrat pe hasil tum ko qudrat hone wali hai

tumhein mearaj-e-duniyawi to hasil ho chuka aage

taraqqi hone wali kya hai zillat hone wali hai

gharaz duniya badalti ja rahi hai aisi tezi se

ki koi din mein maKHdush is ki surat hone wali hai

tumhein kya soch 'nadir' tum na hoge aur na dekhoge

jo kuchh achchhi buri aainda haalat hone wali hai