ye wo aazmaish-e-saKHt hai ki baDe baDe bhi nikal gae

ye vo āzmā.ish-e-saḳht hai ki baḌe baḌe bhī nikal ga.e

ye unhīñ patañgoñ kā zarf hai ki parā.ī aag meñ jal ga.e

tirī āstīn kī kahkashāñ jo nazar paḌī to machal ga.e

jo tirī ḳhushī kā nichoḌ the vahī ashk tāroñ meñ Dhal ga.e

mile sard-āhoñ meñ ashk-e-ġham to sharār-o-barq meñ Dhal ga.e

ye na jaane kaise charāġh the ki havā ke ruḳh pe bhī jal ga.e

kisī kisī phuul par kisī shāḳh par kahīñ ab Thahartī nahīñ nazar

mire āshiyāne ke saath meñ mire hausle bhī to jal ga.e

mire valvaloñ ke mizāj bhī ba-lihāz-e-mausam-e-vaqt haiñ

kabhī sard aah meñ jal ga.e kabhī ashk ban ke pighal ga.e

ye to kaam himmat-e-dil kā hai tirī raah meñ pas-o-pesh kyā

jo Thahar ga.e vo Thahar ga.e jo nikal ga.e vo nikal ga.e

bas ik aañch sī nazar aa.ī thī hai ye raaz ab bhī Dhakā Dhakā

vo terā hasīn itaab thā ki ham apne taav meñ jal ga.e

jo tarāshe fikr ne aa.ine tirā aks husn-e-nazar banā

jinheñ tujh se kuchh bhī lagāo thā vo ḳhayāl sher meñ Dhal ga.e

uThā shor mahfil-e-nāz se huiiñ ābdīda masarrateñ

liyā kis ne naam 'sirāj' kā ki charāġh ashk ke jal ga.e

ye wo aazmaish-e-saKHt hai ki baDe baDe bhi nikal gae

ye unhin patangon ka zarf hai ki parai aag mein jal gae

teri aastin ki kahkashan jo nazar paDi to machal gae

jo teri KHushi ka nichoD the wahi ashk taron mein Dhal gae

mile sard-ahon mein ashk-e-gham to sharar-o-barq mein Dhal gae

ye na jaane kaise charagh the ki hawa ke ruKH pe bhi jal gae

kisi kisi phul par kisi shaKH par kahin ab Thaharti nahin nazar

mere aashiyane ke sath mein mere hausle bhi to jal gae

mere walwalon ke mizaj bhi ba-lihaz-e-mausam-e-waqt hain

kabhi sard aah mein jal gae kabhi ashk ban ke pighal gae

ye to kaam himmat-e-dil ka hai teri rah mein pas-o-pesh kya

jo Thahar gae wo Thahar gae jo nikal gae wo nikal gae

bas ek aanch si nazar aai thi hai ye raaz ab bhi Dhaka Dhaka

wo tera hasin itab tha ki hum apne taw mein jal gae

jo tarashe fikr ne aaine tera aks husn-e-nazar bana

jinhen tujh se kuchh bhi lagao tha wo KHayal sher mein Dhal gae

uTha shor mahfil-e-naz se huin aabdida masarraten

liya kis ne nam 'siraj' ka ki charagh ashk ke jal gae