ye wo hasti hai kisi ki jo asiri mein nahin

ye vo hastī hai kisī kī jo asīrī meñ nahīñ

jo faqīrī meñ maza hai vo amīrī meñ nahīñ

rahm farmānā tirī shaan hai ai rabb-e-qadīr

haañ sitam Dhānā tirī shān-e-qadīrī meñ nahīñ

zo.af baḌh jaatā hai ho jaate haiñ a.azā kamzor

ishq kā lutf javānī meñ hai piirī meñ nahīñ

jo 'anīs' aap ko allāh ne baḳhshā hai kamāl

marsiye kī vo sifat rang-e-dabīrī meñ nahīñ

baaġh se phūloñ kā ras chuus ke uḌ jaatī haiñ

hoshiyārī ye magas meñ hai bhañbīrī meñ nahīñ

ye haqīqat hai nahīñ sabr-o-qanā.at jis meñ

vo bhikārī hai magar ramz-e-faqīrī meñ nahīñ

maiñ zamāne tujhe mash.hūr nahīñ kar sakta

kashf itnā to mirī chashm-e-basīrī meñ nahīñ

ye wo hasti hai kisi ki jo asiri mein nahin

jo faqiri mein maza hai wo amiri mein nahin

rahm farmana teri shan hai ai rabb-e-qadir

han sitam Dhana teri shan-e-qadiri mein nahin

zoaf baDh jata hai ho jate hain aaza kamzor

ishq ka lutf jawani mein hai piri mein nahin

jo 'anis' aap ko allah ne baKHsha hai kamal

marsiye ki wo sifat rang-e-dabiri mein nahin

bagh se phulon ka ras chus ke uD jati hain

hoshiyari ye magas mein hai bhanbiri mein nahin

ye haqiqat hai nahin sabr-o-qanaat jis mein

wo bhikari hai magar ramz-e-faqiri mein nahin

main zamane tujhe mashhur nahin kar sakta

kashf itna to meri chashm-e-basiri mein nahin