ye zad-e-rah kisi marhale mein rakh dena

ye zād-e-rāh kisī marhale meñ rakh denā

koī gulāb mire rāste meñ rakh denā

jo bahs chāhiye fan par to isti.āra koī

kisī radīf kisī qāfiye meñ rakh denā

jo naqsh naqsh-e-mohabbat thā miT chukā dil se

charāġh ab ye kisī tāqche meñ rakh denā

guzār lūñgā kisī tarah hijr kī rāteñ

koī kahānī mire hāfize meñ rakh denā

baġhaur dekhnā chehroñ kā rañg utarte hue

mire hunar kī chamak aa.ine meñ rakh denā

maiñ āp-apnā sitāra huuñ apnī gardish huuñ

mirā nujūm mire zā.iche meñ rakh denā

maiñ dekhūñ kyā hai mirā TūTnā bikharnā 'ramz'

mujhe uThā ke kisī zalzale meñ rakh denā

ye zad-e-rah kisi marhale mein rakh dena

koi gulab mere raste mein rakh dena

jo bahs chahiye fan par to istiara koi

kisi radif kisi qafiye mein rakh dena

jo naqsh naqsh-e-mohabbat tha miT chuka dil se

charagh ab ye kisi taqche mein rakh dena

guzar lunga kisi tarah hijr ki raaten

koi kahani mere hafize mein rakh dena

baghaur dekhna chehron ka rang utarte hue

mere hunar ki chamak aaine mein rakh dena

main aap-apna sitara hun apni gardish hun

mera nujum mere zaiche mein rakh dena

main dekhun kya hai mera TuTna bikharna 'ramz'

mujhe uTha ke kisi zalzale mein rakh dena