ye zamin hum ko mili bahte hue pani ke sath

ye zamīñ ham ko milī bahte hue paanī ke saath

ik samundar paar karnā hai isī kashtī ke saath

umr yūñhī to nahīñ kaTtī bagūloñ kī tarah

ḳhaak uḌne ke liye majbūr hai āñdhī ke saath

jaane kis ummīd par huuñ ābyārī meñ magan

ek pattā bhī nahīñ sūkhī huī Tahnī ke saath

maiñ abhī tak rizq chunñe meñ yahāñ masrūf huuñ

lauT jaate haiñ parinde shaam kī surḳhī ke saath

pheñk de bāhar kī jānib apne andar kī ghuTan

apnī āñkhoñ ko lagā de ghar kī har khiḌkī ke saath

jaan jā saktī hai ḳhushbū ke ta.āqub meñ 'naved'

saañp bhī hotā hai aksar raat kī raanī ke saath

ye zamin hum ko mili bahte hue pani ke sath

ek samundar par karna hai isi kashti ke sath

umr yunhi to nahin kaTti bagulon ki tarah

KHak uDne ke liye majbur hai aandhi ke sath

jaane kis ummid par hun aabyari mein magan

ek patta bhi nahin sukhi hui Tahni ke sath

main abhi tak rizq chunne mein yahan masruf hun

lauT jate hain parinde sham ki surKHi ke sath

phenk de bahar ki jaanib apne andar ki ghuTan

apni aankhon ko laga de ghar ki har khiDki ke sath

jaan ja sakti hai KHushbu ke taaqub mein 'nawed'

sanp bhi hota hai aksar raat ki rani ke sath