ye zamini bhi hai zamani bhi

ye zamīnī bhī hai zamānī bhī

fitrat-e-ishq āsmānī bhī

shart hai jaañ se jā.iye pahle

hai ajab umr-e-jāvedānī bhī

tum ne jo dāstāñ sunā.ī hai

hai vahī to mirī kahānī bhī

kitne dilchasp lagne lagte haiñ

mere qisse tirī zabānī bhī

haiñ zarūrī bahut hamāre liye

ye fazā aag aur paanī bhī

ho ga.ī ḳhatm ik kiran ke saath

raat bhī niiñd bhī kahānī bhī

mat inheñ jāniye dar-o-dīvār

in meñ yādeñ haiñ kuchh suhānī bhī

in dīvāroñ pe hī huī tahrīr

mere maañ baap kī javānī bhī

ham jo ghar chhoḌ kar chale aa.e

the vo ajdād kī nishānī bhī

lā-makāñ hī kā zikr-e-ḳhair 'adīl'

go haiñ qisse bahut makānī bhī

ye zamini bhi hai zamani bhi

fitrat-e-ishq aasmani bhi

shart hai jaan se jaiye pahle

hai ajab umr-e-jawedani bhi

tum ne jo dastan sunai hai

hai wahi to meri kahani bhi

kitne dilchasp lagne lagte hain

mere qisse teri zabani bhi

hain zaruri bahut hamare liye

ye faza aag aur pani bhi

ho gai KHatm ek kiran ke sath

raat bhi nind bhi kahani bhi

mat inhen jaaniye dar-o-diwar

in mein yaaden hain kuchh suhani bhi

in diwaron pe hi hui tahrir

mere man bap ki jawani bhi

hum jo ghar chhoD kar chale aae

the wo ajdad ki nishani bhi

la-makan hi ka zikr-e-KHair 'adil'

go hain qisse bahut makani bhi