ye zindagi hai jahan faraghat ka pal nahin hai

ye zindagī hai jahāñ farāġhat kā pal nahīñ hai

so tai huā hai koī Thikāna aTal nahīñ hai

kahāñ chaleñ aur kaun se dar ko khaTkhaTā.eñ

agar tire paas bhī udāsī kā hal nahīñ hai

azal se hijrat mire muqaddar meñ likhne vaale

to kyā kahānī meñ koī radd-o-badal nahīñ hai

ajab ta'alluq hai jis meñ yaksar sukūñ ke pal haiñ

ajiib rassī hai jis meñ koī bhī bal nahīñ hai

guzar ga.ī zindagānī kāġhaz qalam uThā.e

tumhāre shāyān-e-shān ik bhī ġhazal nahīñ hai

hamārī āñkhoñ meñ dekh sakte ho bahtā jehlam

hamārī bastī meñ ik akelā ye thal nahīñ hai

ye zindagi hai jahan faraghat ka pal nahin hai

so tai hua hai koi Thikana aTal nahin hai

kahan chalen aur kaun se dar ko khaTkhaTaen

agar tere pas bhi udasi ka hal nahin hai

azal se hijrat mere muqaddar mein likhne wale

to kya kahani mein koi radd-o-badal nahin hai

ajab ta'alluq hai jis mein yaksar sukun ke pal hain

ajib rassi hai jis mein koi bhi bal nahin hai

guzar gai zindagani kaghaz qalam uThae

tumhaare shayan-e-shan ek bhi ghazal nahin hai

hamari aankhon mein dekh sakte ho bahta jehlam

hamari basti mein ek akela ye thal nahin hai