yun achanak kisi ki yaad aai

yuuñ achānak kisī kī yaad aa.ī

dil meñ bajne lagī hai shahnā.ī

kyoñ ye dil us galī meñ jaatā hai

jis meñ hai har qadam pe rusvā.ī

us kī har ik adā nashāt-angez

ḳhāmushī us kī ek ra.anā.ī

husn kā raaz to khulā hī nahīñ

haiñ shab-o-roz sab tamāshā.ī

phuul bantī haiñ bas vahī kaliyāñ

chuum letī hai jin ko purvā.ī

fāsle darmiyāñ meñ kitne haiñ

maiñ kahāñ aur kahāñ vo harjā.ī

kāTte kaise zindagī ham log

gar na hote tire tamannā.ī

dil ne har baar terā naam liyā

koī sūrat agar nazar aa.ī

mausam-e-ġham batā.eñ kyā hai 'asar'

kam-sinoñ kī javān añgḌā.ī

yun achanak kisi ki yaad aai

dil mein bajne lagi hai shahnai

kyon ye dil us gali mein jata hai

jis mein hai har qadam pe ruswai

us ki har ek ada nashat-angez

KHamushi us ki ek ranai

husn ka raaz to khula hi nahin

hain shab-o-roz sab tamashai

phul banti hain bas wahi kaliyan

chum leti hai jin ko purwai

fasle darmiyan mein kitne hain

main kahan aur kahan wo harjai

kaTte kaise zindagi hum log

gar na hote tere tamannai

dil ne har bar tera nam liya

koi surat agar nazar aai

mausam-e-gham bataen kya hai 'asar'

kam-sinon ki jawan angDai