yun ashk mohabbat mein bahaya nahin jata

yuuñ ashk mohabbat meñ bahāyā nahīñ jaatā

aur zaḳhm-e-jigar sab ko dikhāyā nahīñ jaatā

kuchh kam nahīñ ho jaa.e kisī ik se mohabbat

dil sab se sar-e-rāh lagāyā nahīñ jaatā

ik vo haiñ ki jo ham ko bhulā baiThe haiñ lekin

ham un ko bhulāte haiñ bhulāyā nahīñ jaatā

ye rāz-e-mohabbat bhī 'ajab raaz hai yaaro

ham laakh chhupāte haiñ chhupāyā nahīñ jaatā

tasvīr ye kis kī mirī āñkhoñ meñ hai 'dānish'

husn aisā kisī aur meñ paayā nahīñ jaatā

yun ashk mohabbat mein bahaya nahin jata

aur zaKHm-e-jigar sab ko dikhaya nahin jata

kuchh kam nahin ho jae kisi ek se mohabbat

dil sab se sar-e-rah lagaya nahin jata

ek wo hain ki jo hum ko bhula baiThe hain lekin

hum un ko bhulate hain bhulaya nahin jata

ye raaz-e-mohabbat bhi 'ajab raaz hai yaro

hum lakh chhupate hain chhupaya nahin jata

taswir ye kis ki meri aankhon mein hai 'danish'

husn aisa kisi aur mein paya nahin jata