yun baiThe rah ke sar-e-rahguzar kya karna

yuuñ baiThe rah ke sar-e-rahguzār kyā karnā

vo jā chukā hai to ab intizār kyā karnā

ye soch kar maiñ tujhe hāl-e-dil nahīñ kahtā

ki apne saath tujhe sogvār kyā karnā

agar ye farz hai to aa mu’āshre pe kareñ

bas ek fard pe jaañ ko nisār kyā karnā

mile haiñ dard to ḳhush ho ke thaam lo yaaro

ki rāh-e-'ishq hai āh-o-pukār kyā karnā

mohabbatoñ kā hadaf rūh-e-nūr hai 'abbās'

badan to miTTī hai miTTī se pyaar kyā karnā

yun baiThe rah ke sar-e-rahguzar kya karna

wo ja chuka hai to ab intizar kya karna

ye soch kar main tujhe haal-e-dil nahin kahta

ki apne sath tujhe sogwar kya karna

agar ye farz hai to aa mu’ashre pe karen

bas ek fard pe jaan ko nisar kya karna

mile hain dard to KHush ho ke tham lo yaro

ki rah-e-'ishq hai aah-o-pukar kya karna

mohabbaton ka hadaf ruh-e-nur hai 'abbas'

badan to miTTi hai miTTi se pyar kya karna