yun bhi baqi hain abhi jine ke aasar mere

yuuñ bhī baaqī haiñ abhī jiine ke āsār mire

bistar-e-marg se uTThe haiñ ka.ī yaar mire

mauj-e-idrāk se sūraj kī shuā.eñ phūTīñ

to nazar aa.e kuchh an-dekhe se kirdār mire

sīna-e-shab meñ machaltā hai udāsī kā badan

ek tasvīr meñ dikhte haiñ ye āzār mire

ḳhvāb bāzār meñ laayā huuñ tijārat ke liye

soch kar karnā zarā saudā ḳharīdār mire

har nazāre meñ chhupā baiThā hai man kā joban

kis tarah ḳhud ko sambhālegā ai hushiyār mire

apnī āñkhoñ meñ tirī pyaas liye phirtā huuñ

ik nazar merī taraf dekh ai dil-dār mire

mujh ko sahrā meñ zarā ḳhaak uḌānī hai abhī

is liye der se ā.eñge parastār mire

pahle mushkil se samundar meñ safīna utrā

aur phir chhūT ga.ī haath se patvār mire

maiñ ne lafzoñ se bunā hai vo zamāna yaaro

ġhaur karne pe nazar ā.eñge ash.ār mire

yun bhi baqi hain abhi jine ke aasar mere

bistar-e-marg se uTThe hain kai yar mere

mauj-e-idrak se suraj ki shuaen phuTin

to nazar aae kuchh an-dekhe se kirdar mere

sina-e-shab mein machalta hai udasi ka badan

ek taswir mein dikhte hain ye aazar mere

KHwab bazar mein laya hun tijarat ke liye

soch kar karna zara sauda KHaridar mere

har nazare mein chhupa baiTha hai man ka joban

kis tarah KHud ko sambhaalega ai hushiyar mere

apni aankhon mein teri pyas liye phirta hun

ek nazar meri taraf dekh ai dil-dar mere

mujh ko sahra mein zara KHak uDani hai abhi

is liye der se aaenge parastar mere

pahle mushkil se samundar mein safina utra

aur phir chhuT gai hath se patwar mere

main ne lafzon se buna hai wo zamana yaro

ghaur karne pe nazar aaenge ashaar mere