yun bhi dekha na kabhi dard ka darman hona

yuuñ bhī dekhā na kabhī dard kā darmāñ honā

haa.e vo nashtar-e-mizhgāñ kā rag-e-jāñ honā

vo tamannāoñ kā rah rah ke pareshāñ honā

vo tirī yaad kā dil meñ tire mehmāñ honā

parde parde meñ tire vasl kā sāmāñ honā

dard-e-pinhāñ kā tirā ġhamza-e-pinhāñ honā

mahshar-e-nāz haiñ zarrāt-e-fazā-e-kaunain

allah allah kisī kāfir kā ḳhirāmāñ honā

har ghaḌī ik na.e aalam kī ḳhabar detā hai

mirā hañsnā mirā ronā mirā hairāñ honā

josh-e-ābādī-e-duniyā se mohabbat ya.anī

dil-e-hasrat-zada kā mahshar-e-hirmāñ honā

aah maiñ huuñ vo siyah-baḳht ki taqdīr meñ thā

barq se mere nasheman kā charāġhāñ honā

ḳhair apnī nahīñ tujh ko ye kahe detā hai

apnī har ek adā par tirā hairāñ honā

jalva-e-bazm-e-azal jalva-e-tūr-e-mahshar

hai mire shauq ke ajzā kā pareshāñ honā

dekhiye nāz-e-taġhāful ko dikhā.e kyā rang

ashk hasrat kā sar-e-dāman-e-mizhgāñ honā

vādī-e-ma.arifat-o-shauq ke allah re nasīb

jis kī qismat meñ thā 'beḳhud' kā bayābāñ honā

yun bhi dekha na kabhi dard ka darman hona

hae wo nashtar-e-mizhgan ka rag-e-jaan hona

wo tamannaon ka rah rah ke pareshan hona

wo teri yaad ka dil mein tere mehman hona

parde parde mein tere wasl ka saman hona

dard-e-pinhan ka tera ghamza-e-pinhan hona

mahshar-e-naz hain zarraat-e-faza-e-kaunain

allah allah kisi kafir ka KHiraman hona

har ghaDi ek nae aalam ki KHabar deta hai

mera hansna mera rona mera hairan hona

josh-e-abaadi-e-duniya se mohabbat yani

dil-e-hasrat-zada ka mahshar-e-hirman hona

aah main hun wo siyah-baKHt ki taqdir mein tha

barq se mere nasheman ka charaghan hona

KHair apni nahin tujh ko ye kahe deta hai

apni har ek ada par tera hairan hona

jalwa-e-bazm-e-azal jalwa-e-tur-e-mahshar

hai mere shauq ke ajza ka pareshan hona

dekhiye naz-e-taghaful ko dikhae kya rang

ashk hasrat ka sar-e-daman-e-mizhgan hona

wadi-e-marifat-o-shauq ke allah re nasib

jis ki qismat mein tha 'beKHud' ka bayaban hona