yun bhi hoti hai saKHawat is ka andaza na tha

yuuñ bhī hotī hai saḳhāvat is kā andāza na thā

bhiik us ghar se milī jis ghar kā darvāza na thā

shukriya terā nigāh-e-nāz terā shukriya

muntashir is tarah apne dil kā shīrāza na thā

ab na mustaqbil ayaañ hai aur na maazī ke nuqūsh

vaqt kā chehra bahut shaffāf thā ġhāza na thā

thī mujhe duniyā se nafrat thā mujhe logoñ se bair

aap par to band mere dil kā darvāza na thā

nāpne aa.e the mujh ko ġharq ho kar rah ga.e

dostoñ ko merī gahrā.ī kā andāza na thā

ye huī uqda-kushā.ī dar-haqīqat bād-e-marg

ziist maidān-e-amal thī koī ḳhamyāza na thā

sehn-e-gulshan meñ milī aksar dobāra tāzgī

dosto kunj-e-qafas meñ zaḳhm-e-dil taaza na thā

qais vo batlā rahā thā ḳhud ko lekin 'ehtishām'

koī bhī sang-e-malāmat koī āvāza na thā

yun bhi hoti hai saKHawat is ka andaza na tha

bhik us ghar se mili jis ghar ka darwaza na tha

shukriya tera nigah-e-naz tera shukriya

muntashir is tarah apne dil ka shiraaza na tha

ab na mustaqbil ayan hai aur na mazi ke nuqush

waqt ka chehra bahut shaffaf tha ghaza na tha

thi mujhe duniya se nafrat tha mujhe logon se bair

aap par to band mere dil ka darwaza na tha

napne aae the mujh ko gharq ho kar rah gae

doston ko meri gahrai ka andaza na tha

ye hui uqda-kushai dar-haqiqat baad-e-marg

zist maidan-e-amal thi koi KHamyaza na tha

sehn-e-gulshan mein mili aksar dobara tazgi

dosto kunj-e-qafas mein zaKHm-e-dil taza na tha

qais wo batla raha tha KHud ko lekin 'ehtisham'

koi bhi sang-e-malamat koi aawaza na tha