yun bhi hui hai unki inayat kabhi kabhi

yuuñ bhī huī hai un kī ināyat kabhī kabhī

dil par guzar ga.ī hai qayāmat kabhī kabhī

ai chashm-e-iltifāt ye kaisā tilism hai

paatā huuñ ab jo dard meñ lazzat kabhī kabhī

shaiḳh-e-haram ho muftī-e-āzam ho yā imaam

har nek dil ko hotī hai chāhat kabhī kabhī

allah re shauq-e-dīd ki ḳhud apnī zaat meñ

dekhī hai maiñ ne aap kī sūrat kabhī kabhī

maiñ ne to muñh se uf bhī nahīñ kī hai aaj tak

tum ne zarūr kī hai shikāyat kabhī kabhī

tum bhī 'ziyā' fareb-e-tabassum meñ aa ga.e

tum ko bhī ho chukī hai nadāmat kabhī kabhī

yun bhi hui hai un ki inayat kabhi kabhi

dil par guzar gai hai qayamat kabhi kabhi

ai chashm-e-iltifat ye kaisa tilism hai

pata hun ab jo dard mein lazzat kabhi kabhi

shaiKH-e-haram ho mufti-e-azam ho ya imam

har nek dil ko hoti hai chahat kabhi kabhi

allah re shauq-e-did ki KHud apni zat mein

dekhi hai main ne aap ki surat kabhi kabhi

main ne to munh se uf bhi nahin ki hai aaj tak

tum ne zarur ki hai shikayat kabhi kabhi

tum bhi 'ziya' fareb-e-tabassum mein aa gae

tum ko bhi ho chuki hai nadamat kabhi kabhi