yun bhi kya sone mein tujhko tolta hai koi aur

yuuñ bhī kyā sone meñ tujh ko toltā hai koī aur

jis qadar maiñ chāhtā huuñ chāhtā hai koī aur

maiñ bhalā kaise kahūñ ab she'r us kī yaad meñ

merī tanhā.ī bhī ab to bāñTtā hai koī aur

maiñ tirī is zaat se jitnā bhī kar luuñ iḳhtilāf

mere andar tere haq meñ boltā hai koī aur

is liye bhī der se jaatā huuñ apne ghar ko maiñ

ghar kā darvāza bhī ab to kholtā hai koī aur

jāgtā thā maiñ kisī kī yaad meñ pahle pahal

raat bhar merī jagah ab jāgtā hai koī aur

ye kabhī tere gulābī haath the mere liye

ab tirā dast-e-hinā.ī chūmtā hai koī aur

maiñ nashe meñ huuñ ki ye duniyā hai kuchh mad.hosh sī

maiñ bulātā huuñ kisī ko boltā hai koī aur

merī āñkhoñ kī tamanna thī tujhe dekhā karūñ

aañkh bhar ke tujh ko 'ansar' dekhtā hai koī aur

yun bhi kya sone mein tujh ko tolta hai koi aur

jis qadar main chahta hun chahta hai koi aur

main bhala kaise kahun ab she'r us ki yaad mein

meri tanhai bhi ab to banTta hai koi aur

main teri is zat se jitna bhi kar lun iKHtilaf

mere andar tere haq mein bolta hai koi aur

is liye bhi der se jata hun apne ghar ko main

ghar ka darwaza bhi ab to kholta hai koi aur

jagta tha main kisi ki yaad mein pahle pahal

raat bhar meri jagah ab jagta hai koi aur

ye kabhi tere gulabi hath the mere liye

ab tera dast-e-hinai chumta hai koi aur

main nashe mein hun ki ye duniya hai kuchh madhosh si

main bulata hun kisi ko bolta hai koi aur

meri aankhon ki tamanna thi tujhe dekha karun

aankh bhar ke tujh ko 'ansar' dekhta hai koi aur