yun bhi nahin ki dil mein koi gham nahin raha

yuuñ bhī nahīñ ki dil meñ koī ġham nahīñ rahā

ye silsila kuchh itnā munazzam nahīñ rahā

dil se to ḳhair dho ga.ī bārish tamām naqsh

dīvār-e-shahr kā bhī vo aalam nahīñ rahā

zid par vo apnī aaj bhī qaa.em to hai magar

aglā sā vo bayān meñ dam-ḳham nahīñ rahā

māyūs ho chukā hai ki hai mutma.in ye dil

vo zaḳhm bhar ga.e haiñ ki marham nahīñ rahā

kashtī-e-dil to ek thapeḌe kī maar thī

tūfān-e-nāz kis liye ab tham nahīñ rahā

chhoḌī hai jab se ham ne 'zafar' ājizī kī ḳhū

itnā mizāj us kā bhī barham nahīñ rahā

yun bhi nahin ki dil mein koi gham nahin raha

ye silsila kuchh itna munazzam nahin raha

dil se to KHair dho gai barish tamam naqsh

diwar-e-shahr ka bhi wo aalam nahin raha

zid par wo apni aaj bhi qaem to hai magar

agla sa wo bayan mein dam-KHam nahin raha

mayus ho chuka hai ki hai mutmain ye dil

wo zaKHm bhar gae hain ki marham nahin raha

kashti-e-dil to ek thapeDe ki mar thi

tufan-e-naz kis liye ab tham nahin raha

chhoDi hai jab se hum ne 'zafar' aajizi ki KHu

itna mizaj us ka bhi barham nahin raha