yun bhi tumhaare shahr mein ab dil nahin rahe

yuuñ bhī tumhāre shahr meñ ab dil nahīñ rahe

jo the bhī ab vo ishq ke qābil nahīñ rahe

maiñ jin se kho gayā thā mujhe DhūñDhte nahīñ

jo mujh se kho ga.e the mujhe mil nahīñ rahe

kuchh to hamārī soch se ūñchā nikal gayā

kuchh ham bhī terī diid ke qābil nahīñ rahe

vo aa.ina dikhā nahīñ paayā tumhārā aks

so ham us aa.ine ke muqābil nahīñ rahe

tū bhī anā-parast hai so kholtā nahīñ

aur ham bhī tere dar se kahīñ hil nahīñ rahe

jin kī vajah se aaj lagī aag kaun haiñ

vo kaun haiñ jo bhiiḌ meñ shāmil nahīñ rahe

ham bhī tumhāre āḳhirī hamrāh the nahīñ

tum bhī hamārī āḳhirī manzil nahīñ rahe

yun bhi tumhaare shahr mein ab dil nahin rahe

jo the bhi ab wo ishq ke qabil nahin rahe

main jin se kho gaya tha mujhe DhunDhte nahin

jo mujh se kho gae the mujhe mil nahin rahe

kuchh to hamari soch se uncha nikal gaya

kuchh hum bhi teri did ke qabil nahin rahe

wo aaina dikha nahin paya tumhaara aks

so hum us aaine ke muqabil nahin rahe

tu bhi ana-parast hai so kholta nahin

aur hum bhi tere dar se kahin hil nahin rahe

jin ki wajah se aaj lagi aag kaun hain

wo kaun hain jo bhiD mein shamil nahin rahe

hum bhi tumhaare aaKHiri hamrah the nahin

tum bhi hamari aaKHiri manzil nahin rahe