yun chale daur to rindon ka baDa kaam chale

yuuñ chale daur to rindoñ kā baḌā kaam chale

ḳhum baḌhe shīsha jhuke baada Dhale jaam chale

jhel kar ahl-e-jahāñ sadma-o-ālām chale

shād-kām aa.e jo duniyā meñ vo nākām chale

be-piye kuchh nahīñ jiine kā maza ai saaqī

rāt-din jaam chale jaam chale jaam chale

kūcha-e-ishq meñ taklīf hī taklīf rahī

ham ba-ārām na aa.e na ba-ārām chale

haath par haath dhare ahl-e-nazar baiThe haiñ

husn agar kaam chalā.e to koī kaam chale

zinda rahne ke maqāsid haiñ haqīqat meñ yahī

haath paañv apne chaleñ kaam chale naam chale

vādī-e-ishq meñ rahbar kī zarūrat kyā hai

ham chaleñ aur hamārā dil-e-nākām chale

muskurāte haiñ jo ġhunche to khile jaate haiñ phuul

daur-e-jām aise meñ ai sāqī-e-gulfām chale

ġhair mumkin hai baġhair us ke mohabbat kā nibāh

dil se miltā nahīñ jab dil hī to kyā kaam chale

mudda.ā ye hai nikal aa.e dobāra ḳhurshīd

ki jahāñ shaam huī aap sar-e-bām chale

kyuuñ kahā maiñ ne ki sun lījiye rūdād-e-sitam

vo bigaḌ kar uThe dete hue dushnām chale

hazrat-e-'nūh' uThāte haiñ jo tūfān-e-suḳhan

shāyad is kā ho ye matlab ki mirā naam chale

yun chale daur to rindon ka baDa kaam chale

KHum baDhe shisha jhuke baada Dhale jam chale

jhel kar ahl-e-jahan sadma-o-alam chale

shad-kaam aae jo duniya mein wo nakaam chale

be-piye kuchh nahin jine ka maza ai saqi

raat-din jam chale jam chale jam chale

kucha-e-ishq mein taklif hi taklif rahi

hum ba-aram na aae na ba-aram chale

hath par hath dhare ahl-e-nazar baiThe hain

husn agar kaam chalae to koi kaam chale

zinda rahne ke maqasid hain haqiqat mein yahi

hath panw apne chalen kaam chale nam chale

wadi-e-ishq mein rahbar ki zarurat kya hai

hum chalen aur hamara dil-e-nakaam chale

muskuraate hain jo ghunche to khile jate hain phul

daur-e-jam aise mein ai saqi-e-gulfam chale

ghair mumkin hai baghair us ke mohabbat ka nibah

dil se milta nahin jab dil hi to kya kaam chale

muddaa ye hai nikal aae dobara KHurshid

ki jahan sham hui aap sar-e-baam chale

kyun kaha main ne ki sun lijiye rudad-e-sitam

wo bigaD kar uThe dete hue dushnam chale

hazrat-e-'nuh' uThate hain jo tufan-e-suKHan

shayad is ka ho ye matlab ki mera nam chale