yun chup hai shahr jaise ki kuchh bhi hua na ho

yuuñ chup hai shahr jaise ki kuchh bhī huā na ho

shāyad ab is ke ba.ad koī hādisa na ho

kāñpā hai barg barg sā jo be-sabab abhī

ye jism āñdhiyoñ kā koī rāsta na ho

maiñ thak chukā huuñ dasht-e-masāfat kī dhuup meñ

koī sarāb raah marī dekhtā na ho

tuġhyān-e-bevafā.ī meñ Duubā rahūñ maiñ kaash

mere nasīb meñ tujhe ab dekhnā na ho

ubhrī hai ḳhushk pattoñ meñ ik chīḳh duur tak

be-rahm koī paañv unheñ rauñdtā na ho

sham-e-taraf jalāne se pahle hī dekh lo

ye dasht-e-nā-murādī-e-dil kā diyā na ho

jo shaḳhs kal milā thā 'musavvir' ba-tarz-e-ḳhās

us kī hī shakl kā vo koī dūsrā na ho

yun chup hai shahr jaise ki kuchh bhi hua na ho

shayad ab is ke baad koi hadisa na ho

kanpa hai barg barg sa jo be-sabab abhi

ye jism aandhiyon ka koi rasta na ho

main thak chuka hun dasht-e-masafat ki dhup mein

koi sarab rah mari dekhta na ho

tughyan-e-bewafai mein Duba rahun main kash

mere nasib mein tujhe ab dekhna na ho

ubhri hai KHushk patton mein ek chiKH dur tak

be-rahm koi panw unhen raundta na ho

sham-e-taraf jalane se pahle hi dekh lo

ye dasht-e-na-muradi-e-dil ka diya na ho

jo shaKHs kal mila tha 'musawwir' ba-tarz-e-KHas

us ki hi shakl ka wo koi dusra na ho