yun dekh mere dida-e-pur-ab ki gardish

yuuñ dekh mire dīda-e-pur-āb kī gardish

dariyā meñ ho jis tarah se girdāb kī gardish

martā huuñ tire vāste rotā huuñ zi-bas yaar

hai sail mirī chashm meñ girdāb kī gardish

phir jaatī haiñ is tarah se ik pal meñ vo añkhiyāñ

juuñ bazm meñ ho jām-e-mai-e-nāb kī gardish

az-bas-ki hai āñkhoñ meñ ḳhumār us ghaḌī saaqī

mai māñge hai tujh se jo har ahbāb kī gardish

go ḳhaak huā to bhī phirā ban ke bagūlā

ho kar na ga.ī āshiq-e-betāb kī gardish

jins-e-ḳhirad-o-sabr bin is dil ko ho kyā chain

muflis ko burī hotī hai asbāb kī gardish

dil zulf-o-ruḳh-e-yār meñ 'saudā' na phire kyuuñ

ḳhush aa.e hai us ko shab-e-mahtāb kī gardish

yun dekh mere dida-e-pur-ab ki gardish

dariya mein ho jis tarah se girdab ki gardish

marta hun tere waste rota hun zi-bas yar

hai sail meri chashm mein girdab ki gardish

phir jati hain is tarah se ek pal mein wo ankhiyan

jun bazm mein ho jam-e-mai-e-nab ki gardish

az-bas-ki hai aankhon mein KHumar us ghaDi saqi

mai mange hai tujh se jo har ahbab ki gardish

go KHak hua to bhi phira ban ke bagula

ho kar na gai aashiq-e-betab ki gardish

jins-e-KHirad-o-sabr bin is dil ko ho kya chain

muflis ko buri hoti hai asbab ki gardish

dil zulf-o-ruKH-e-yar mein 'sauda' na phire kyun

KHush aae hai us ko shab-e-mahtab ki gardish