yun imtihan mera lete rahe masail

yuuñ imtihān merā lete rahe masā.il

ik haath par thā dariyā ik haath par thā sāhil

sūkhī paḌīñ haiñ āñkheñ TuuTā huā hai dil bhī

kahte haiñ ishq jis ko hotā bahut hai mushkil

is bāda-kash ko dekho mastī meñ mast hai yuuñ

hai apne aap hī meñ jaise vo ek mahfil

har naqsh-e-pā ko tere ham chuum kar chaleñge

apnī mohabbatoñ meñ tū kar le ham ko shāmil

ta.alīm-yāfta hai phir bhī ye chīra-dastī

bartāv kar rahe haiñ jaise ki haiñ vo jāhil

tū kyoñ samajh rahā hai ḳhud ko ki be-gunah hai

jis ne miTā.e sapne hotā hai vo bhī qātil

guzrā hai saarā jīvan laḌte hue jahāñ se

duniyā ke har chalan kā hāsil nahīñ thā qaa.il

ho kar judā vo tujh se kuchh aisā kho gayā hai

ab DhūñDtā hai ḳhud ko har mai-kade meñ hāsil

yun imtihan mera lete rahe masail

ek hath par tha dariya ek hath par tha sahil

sukhi paDin hain aankhen TuTa hua hai dil bhi

kahte hain ishq jis ko hota bahut hai mushkil

is baada-kash ko dekho masti mein mast hai yun

hai apne aap hi mein jaise wo ek mahfil

har naqsh-e-pa ko tere hum chum kar chalenge

apni mohabbaton mein tu kar le hum ko shamil

talim-yafta hai phir bhi ye chira-dasti

bartaw kar rahe hain jaise ki hain wo jahil

tu kyon samajh raha hai KHud ko ki be-gunah hai

jis ne miTae sapne hota hai wo bhi qatil

guzra hai sara jiwan laDte hue jahan se

duniya ke har chalan ka hasil nahin tha qail

ho kar juda wo tujh se kuchh aisa kho gaya hai

ab DhunDta hai KHud ko har mai-kade mein hasil