yun jo khulta hai zamane ka bharam achchha hai

yuuñ jo khultā hai zamāne kā bharam achchhā hai

ham pe hote haiñ zamāne ke sitam achchhā hai

vo qadam kyā jo tajassus meñ rahe manzil ke

baḌh ke ḳhud chuum le manzil vo qadam achchhā hai

hai tamannā-e-asīrī to kabhī is meñ ulajh

gesū-e-vaqt kā pech achchhā hai ḳham achchhā hai

amn-o-insāf-o-musāvāt kī ḳhātir logo

tum uThāo jo baġhāvat kā alam achchhā hai

qatre milte haiñ to vo hote haiñ dariyā meñ shumār

ham milā kar jo chaleñ apne qadam achchhā hai

shīsha-e-dil meñ to hai dost ke irfāñ kī sharāb

shīsha-e-dil se kahāñ sāġhar-o-jam achchhā hai

mil ke kuchh karne kā ab aayā hai vaqt ai yaaro

jis qadar ham meñ rahe fāsla kam achchhā hai

'aḳhtar' aa kar chaman-e-gang-o-jaman ko dekhe

jo ye kahtā hai ki gulzār-e-iram achchhā hai

yun jo khulta hai zamane ka bharam achchha hai

hum pe hote hain zamane ke sitam achchha hai

wo qadam kya jo tajassus mein rahe manzil ke

baDh ke KHud chum le manzil wo qadam achchha hai

hai tamanna-e-asiri to kabhi is mein ulajh

gesu-e-waqt ka pech achchha hai KHam achchha hai

amn-o-insaf-o-musawat ki KHatir logo

tum uThao jo baghawat ka alam achchha hai

qatre milte hain to wo hote hain dariya mein shumar

hum mila kar jo chalen apne qadam achchha hai

shisha-e-dil mein to hai dost ke irfan ki sharab

shisha-e-dil se kahan saghar-o-jam achchha hai

mil ke kuchh karne ka ab aaya hai waqt ai yaro

jis qadar hum mein rahe fasla kam achchha hai

'aKHtar' aa kar chaman-e-gang-o-jaman ko dekhe

jo ye kahta hai ki gulzar-e-iram achchha hai