yun kahne ko KHanjar ko bhi KHanjar hi kahenge

yuuñ kahne ko ḳhanjar ko bhī ḳhanjar hī kaheñge

par kyā tere abrū ke barābar hī kaheñge

zāhid jo mazā mai meñ yahāñ pūchh na ham se

kahnā hai jo kuchh vo lab-e-kausar hī kaheñge

maanā na kareñ va.ada hameñ bhī to kaheñ vo

gar kuchh nahīñ hāl-e-dil-e-muztar hī kaheñge

sunñe kī koī had bhī hai haañ pūchhte kyoñ ho

ham haal bhī apnā sar-e-mahshar hī kaheñge

do lafzoñ meñ kyūñkar ho na sunñā hai na suniye

ham kahne ko baiTheñge to daftar hī kaheñge

sunñe ko to kyā jāniye kyā kyā na suneñge

kahne ko to hāl-e-dil-e-muztar hī kaheñge

is meñ tirī mizhgāñ ho ki ho gosha-e-abrū

chubh jaa.e jo dil meñ use nashtar hī kaheñge

yuuñ kaam kiye us ne hazāroñ hameñ kyā kaam

ham ā.ina-sāzī-e-sikandar hī kaheñge

tum ne bhī to dekhā hai 'fahīm' us ko kaho na

ham apnī sī kahne ko barābar hī kaheñge

yun kahne ko KHanjar ko bhi KHanjar hi kahenge

par kya tere abru ke barabar hi kahenge

zahid jo maza mai mein yahan puchh na hum se

kahna hai jo kuchh wo lab-e-kausar hi kahenge

mana na karen wada hamein bhi to kahen wo

gar kuchh nahin haal-e-dil-e-muztar hi kahenge

sunne ki koi had bhi hai han puchhte kyon ho

hum haal bhi apna sar-e-mahshar hi kahenge

do lafzon mein kyunkar ho na sunna hai na suniye

hum kahne ko baiThenge to daftar hi kahenge

sunne ko to kya jaaniye kya kya na sunenge

kahne ko to haal-e-dil-e-muztar hi kahenge

is mein teri mizhgan ho ki ho gosha-e-abru

chubh jae jo dil mein use nashtar hi kahenge

yun kaam kiye us ne hazaron hamein kya kaam

hum aaina-sazi-e-sikandar hi kahenge

tum ne bhi to dekha hai 'fahim' us ko kaho na

hum apni si kahne ko barabar hi kahenge