yun KHak ki manind na rahon pe bikhar ja

yuuñ ḳhaak kī mānind na rāhoñ pe bikhar jā

kirnoñ kī tarah jhiil ke siine meñ utar jā

mat bhuul ki ab bhī hai tirī ghaat meñ sayyād

suntā hai koī paañv kī āvāz Thahar jā

mat dekh tamannā kī taraf aañkh uThā kar

andhoñ kī tarah nuur ke dariyā se guzar jā

manzil kī talab apnī taraf khīñch rahī hai

aur raat musāfir se ye kahtī hai ki ghar jā

itnā to samajh kyā hai tirī raah meñ haa.il

aahū kī tarah apne hī saa.e se na Dar jā

shāyad ki koī barhana-pā ho tire pīchhe

jaate hue is raah ko kāñToñ se na bhar jā

patthar nahīñ āñkheñ to ye aañsū haiñ baḌī chiiz

bhīge hue phūloñ kī tarah aur nikhar jā

yā dasht meñ us bazm kī raunaq ko na kar yaad

yā shahr kī dīvār se sar phoḌ ke mar jā

ik umr se royā huuñ na taḌpā huuñ meñ 'shahzād'

ehsās kā bādal kabhī barsā hai na garjā

yun KHak ki manind na rahon pe bikhar ja

kirnon ki tarah jhil ke sine mein utar ja

mat bhul ki ab bhi hai teri ghat mein sayyaad

sunta hai koi panw ki aawaz Thahar ja

mat dekh tamanna ki taraf aankh uTha kar

andhon ki tarah nur ke dariya se guzar ja

manzil ki talab apni taraf khinch rahi hai

aur raat musafir se ye kahti hai ki ghar ja

itna to samajh kya hai teri rah mein hail

aahu ki tarah apne hi sae se na Dar ja

shayad ki koi barhana-pa ho tere pichhe

jate hue is rah ko kanTon se na bhar ja

patthar nahin aankhen to ye aansu hain baDi chiz

bhige hue phulon ki tarah aur nikhar ja

ya dasht mein us bazm ki raunaq ko na kar yaad

ya shahr ki diwar se sar phoD ke mar ja

ek umr se roya hun na taDpa hun mein 'shahzad'

ehsas ka baadal kabhi barsa hai na garja